di SALVATORE BARBARO – LIBRITALIA
U celu è ‘cchjnu i stiji sta nottata…
I perli pari tuttu trapuntatu.
Un’aria, spira: fina, profumata,
e mbarzama chist’attimu ncantatu.
Un frusciu s’odi, o lumi di la luna,
e ‘ddi lu maru nchjana a li sipali
un leggiu scrusciu d’unda; e, ad una ad una,
cantandu, vi si mbiscanu’i cicali….
Ch’è duci l’aria, nta sta notti chjara!
Ah, si mi addormarria nta sta finestra,
u nommu sentarria quant’esti amara,
anzemi a stu profumu di ginestra,
sta ricordanza chi ‘mmi fa ntristiri!…
Adduvi s’u i speranzi d’u passatu,
e i sogni cari? Ormai sta pe’ ‘ffiniri:
aspettu sul’u mi s’astuta u shjatu.
Oh, littara d’amuri, scunzulata!
I chjanti e ‘ppeni, e ‘ssenza mai rigettu,
fu la vita! Fu ‘ssenza nu ristoru!
Oh littara, di gralimi ammacchjata….
ancora mo’ jio ciangiu, mentr’aspettu
u fìninu sti parpiti…e ‘mm’u moru!
Recensioni
Ancora non ci sono recensioni.